ཞབས་དྲུང་དང་པོ་ཟླ་བ་རྒྱལ་མཚན་ནས།།
ཉེ་བར་བཟུང་བའི་ཞབས་དྲུང་རིམ་བྱོན་གྱིས།།
རྗེས་སུ་བཟུང་བའི་སྟོང་འཁོར་དགོན་སྡེ་ཆེའི།།
སྔོན་བྱོན་དམ་པ་རྣམས་ཀྱི་བཀའ་དྲིན་དྲན།།
ལོ་རྒྱུས་ནམ་མཁའ་ལྟ་བུའི་ཀློང་ཡངས་ན།།
གཅིག་ནས་གཅིག་ཏུ་བརྒྱུད་པའི་རྒན་རབས་རྣམས།།
ཕྱི་རབས་རྗེས་འབྲང་རྣམས་ཀྱི་མིག་ལམ་ན།།
ཉི་ཟླའི་རྣ་ཆ་མནབས་པའི་རི་དབང་འདྲ།།
ཚང་ལ་མ་ནོར་བཤད་སྒྲུབ་བྱ་བ་ཡི།།
འཁོར་ལོ་རྣམ་གསུམ་གནའ་བོའི་ཕྱག་སྲོལ་བཞིན།།
མན་ངག་གནང་བའི་བཀའ་དྲིན་འགྲན་ཟླ་བྲལ།།
དུས་འགྱུར་འཚུབ་རླུང་རྒོད་པའི་བར་སྣང་ནས།།
ཐབས་ངན་གཡོ་ཇུས་འོག་ཏུ་མ་ཐེབས་པར།།
ཐད་ཀར་ནམ་འཕང་བཅད་པའི་རྒོད་ཕོ་བཞིན།།
སླར་ཡང་དགོན་འདིར་ཕེབས་པའི་བཀའ་དྲིན་ལྕི།།
ས་རྡོའི་ཕུང་པོར་བསྒྱུར་པའི་དགོན་ཤུལ་ནས།།
འཚོ་བའི་མཐུན་རྐྱེན་ཞན་པའི་གནས་སྟངས་འོག།།
ཡོད་ཚད་ནུས་པས་བསྟན་དང་འགྲོ་དོན་དུ།།
དགོན་འདི་བསྐྱར་བཞེངས་གནང་བ་བརྗེད་དུ་མེད།།
ཕྱི་ལོ་ཆིག་སྟོང་དགུ་བརྒྱ་གྱ་གཅིག་ལོར།།
ཕྱི་དང་ནང་གི་བཀོད་པ་སླར་གསོ་ཞིང་།།
རླབས་ཆེན་བསོད་ནམས་ཞིང་སར་ལེགས་བསྐྲུན་མཁན།།
རྒན་རབས་བརྒྱ་ཕྲག་བརྒལ་བ་བཀའ་དྲིན་ཆེ།།
མདོ་སྔགས་གསུང་རབ་གནད་ལ་ཉམས་ལེན་པོ།།
སྙིང་ལ་རུས་པ་བཅུག་པའི་སྙིང་སྟོབས་ཅན།།
རང་ཡུལ་ཆོས་སྲིད་དོན་དུ་གཞོལ་བ་ཡི།།
དགོན་འདིའི་རྒན་རབས་ཡོངས་ལ་བཀའ་དྲིན་ཞུ།།
སྐུ་ཚེགས་ངལ་བ་དུ་མ་ལྷུར་བླངས་ནས།།
གནའ་བོའི་མཐོང་བ་བརྒྱུད་པའི་ཕྱག་ལེན་རྣམས།།
བློ་གསལ་གཞོན་སྐྱེས་ཚོགས་ལ་གནང་མཛད་པའི།།
རྒན་རབས་རྣམ་པ་ཡུལ་འདིའི་ཁྱད་ནོར་ཉིད།།
དེ་ལྟར་གཞལ་དཀའི་བཀའ་དྲིན་ཆེ་ལགས་ན།།
ཁྱེད་ཅག་ཐུགས་ཀྱི་རེ་བའི་དོན་སླད་དུ།།
རྒྱུན་འཛིན་བྱེད་པོ་སྤང་ལ་ཤ་མོང་བཞིན།།
མང་དུ་འཕེལ་ཞིང་བཀའ་དྲིན་གསོ་བར་བྱེད།།
གནའ་དེང་མི་རབས་བརྗེ་བའི་དུས་མཚམས་ནས།།
ལྷག་བསམ་སྙིང་སྟོབས་ཅན་གྱི་རྒན་རབས་ཚོར།།
སྐུ་དྲིན་ཆེའོ་ཞེས་པའི་ཚིག་དུམ་ཞིག།
འདུས་མང་ཡོངས་ཀྱི་ཚབ་མཚོན་ཙམ་དུ་བཀོད།།
དེ་ལྟར་སྔོན་བྱོན་དམ་པ་རིམ་པ་ལས།།
ལེགས་པར་བརྒྱུད་པའི་མདོ་སྔགས་ཟུང་འབྲེལ་གྱི།།
དགེ་ལྡན་ལུགས་བཟང་གཙང་མའི་ཅོད་པན་ལ།།
སྤྱི་བོའི་གཙུག་ཏུ་གཟུར་གནས་སུས་མི་བཀུར།།
འདུས་སྡེ་ཆེན་པོ་གསང་ཆེན་རྡོར་གླིང་གི།
དགེ་འདུན་འདུས་མང་ཐུགས་མཐུན་ཁྲིམས་གཙང་ཞིང་།།
བཤད་སྒྲུབ་དབྱར་མཚོའི་དཔལ་ལ་འགྲན་པ་ལྟར།།
ཕུན་ཚོགས་སྡེ་བཞིའི་དཔལ་གཡང་དེང་འདིར་འཕྱུར།།
མདོར་ན་སྔོན་བྱོན་དམ་པའི་ཐུགས་བསྐྱེད་དང་།།
སྐལ་ལྡན་ལས་འཕྲོ་ཅན་གྱི་སློབ་བུའི་ཚོགས།།
པདྨའི་མཚོ་ལ་ངང་ཁྱུ་འཁོར་བ་ལྟར།།
འཇིག་རྟེན་འདི་རུ་དད་པའི་རྟེན་དུ་བཞད།།
No comments:
Post a Comment